करुणा सेवा ट्रस्ट व शिवसेना वैद्यकीय मदत कक्षाचा सेवाभावी उपक्रम; शेकडो गरजूंना दिलासा
मुंबई : कै. एकनाथ दत्तात्रेय सुर्यराव यांच्या १ जुलै रोजी होणाऱ्या जयंतीच्या पूर्वसंध्येला त्यांच्या पवित्र स्मृतीस अभिवादन म्हणून समाजोपयोगी उपक्रमाचे आयोजन करण्यात आले. श्री. प्रसाद एकनाथ सुर्यराव यांच्या पुढाकारातून करुणा सेवा ट्रस्ट आणि शिवसेना वैद्यकीय मदत कक्ष यांच्या संयुक्त विद्यमाने मुंबईतील के.ई.एम. रुग्णालयाबाहेर भव्य अन्नदान तसेच गरजू रुग्ण व त्यांच्या नातेवाईकांना मोफत औषधांचे वाटप करण्यात आले.
महाराष्ट्रासह विविध राज्यांतून उपचारासाठी मुंबईत आलेल्या रुग्णांच्या नातेवाईकांनी या सेवाभावी उपक्रमाला उत्स्फूर्त प्रतिसाद दिला. अन्नदानासाठी लाभार्थ्यांच्या लांबच लांब रांगा लागल्या होत्या. शेकडो गरजू नागरिकांनी या उपक्रमाचा लाभ घेत समाधान व्यक्त केले. उपचारासाठी आलेल्या अनेक कुटुंबांसाठी हा उपक्रम मोठा आधार ठरला.
कै. एकनाथ दत्तात्रेय सुर्यराव यांनी आयुष्यभर समाजसेवा, मानवता आणि गरजूंना मदतीचा हात देण्याचा जो आदर्श निर्माण केला, तोच सेवेचा वारसा त्यांचे सुपुत्र श्री. प्रसाद एकनाथ सुर्यराव समर्थपणे पुढे नेत आहेत. समाजातील वंचित, गरजू आणि संकटात सापडलेल्या नागरिकांच्या मदतीसाठी ते सातत्याने विविध सामाजिक व सेवाभावी उपक्रम राबवत असून, त्यांच्या कार्याचे सर्व स्तरांतून कौतुक होत आहे.
वडिलांच्या जयंतीनिमित्त आयोजित करण्यात आलेला अन्नदान व मोफत औषध वाटपाचा हा उपक्रम म्हणजे कै. एकनाथ दत्तात्रेय सुर्यराव यांना वाहिलेली खरी आदरांजली असल्याची भावना उपस्थितांनी व्यक्त केली. समाजातील दुर्बल घटकांच्या चेहऱ्यावर आनंद फुलविणे आणि मानवसेवेचा संदेश कृतीतून देणे, हाच या उपक्रमामागील मुख्य उद्देश असल्याचे आयोजकांनी सांगितले.
या सेवाभावी उपक्रमामुळे गरजू रुग्ण आणि त्यांच्या कुटुंबीयांना मोठा दिलासा मिळाला असून, समाजाप्रती असलेली बांधिलकी, सामाजिक उत्तरदायित्व आणि निःस्वार्थ मानवसेवेचा संदेश देणारा हा उपक्रम अनेकांसाठी प्रेरणादायी ठरत आहे. कै. एकनाथ दत्तात्रेय सुर्यराव यांच्या स्मृतीप्रित्यर्थ राबविण्यात आलेल्या या उपक्रमाचे सर्व स्तरांतून कौतुक होत असून, समाजसेवेची ही परंपरा भविष्यातही अशाच जोमाने सुरू राहावी, अशी अपेक्षाही नागरिकांनी व्यक्त केली.
Leave a Reply