टिटवाळा : अजय शेलार
पोलीस दलात कर्तव्यनिष्ठा, प्रामाणिकपणा, शिस्त आणि समर्पणाच्या भावनेने उल्लेखनीय सेवा बजावणारे पोलीस कर्मचारी योगेश भारती बाळकृष्ण वाघेरे यांना त्यांच्या उत्कृष्ट सेवेसाठी केंद्रीय गृह मंत्रालयाच्या ‘उत्कृष्ट सेवा पदका’ने गौरविण्यात आले आहे. या सन्मानामुळे त्यांच्या सेवाभावी कार्याची आणि कर्तव्याप्रती असलेल्या निष्ठेची पुन्हा एकदा दखल घेण्यात आली असून, मित्रपरिवार, सहकारी आणि परिचितांकडून त्यांच्यावर अभिनंदनाचा वर्षाव होत आहे. योगेश वाघेरे यांनी पोलीस दलातील आपल्या सेवाकाळात विविध ठिकाणी कर्तव्य बजावताना कायदा व सुव्यवस्था राखण्यासोबतच नागरिकांशी संवेदनशीलतेने वागत पोलीस दलाची विश्वासार्हता अधिक दृढ करण्यासाठी प्रयत्न केले. पोलीस सेवेत कर्तव्य बजावताना अनेकदा प्रतिकूल परिस्थिती, तणावपूर्ण प्रसंग आणि आव्हानात्मक जबाबदाऱ्या स्वीकाराव्या लागतात. अशा परिस्थितीतही संयम, शिस्त आणि कर्तव्यनिष्ठा कायम ठेवत केलेल्या उल्लेखनीय कामगिरीची ही सन्मानाची पावती मानली जात आहे.
योगेश वाघेरे यांचा टिटवाळ्याशीही विशेष कार्यसंबंध राहिला आहे. सन २०११ ते २०१६ या कालावधीत ठाणे येथील जलद प्रतिसाद पथक (QRT) मध्ये कर्तव्य बजावले. सन २०१६ मध्ये टिटवाळा पोलीस ठाणे येथे गुन्हे प्रकटीकरण शाखेत कर्तव्य बजावले.या काळात त्यांनी आपल्या कर्तव्याची जबाबदारी प्रामाणिकपणे पार पाडत नागरिकांशी सातत्याने संपर्क ठेवला. स्थानिक पातळीवरील कायदा व सुव्यवस्था, नागरिकांच्या समस्या आणि पोलीस प्रशासनाशी संबंधित विविध जबाबदाऱ्या पार पाडताना त्यांच्या कार्यपद्धतीची सहकाऱ्यांसह नागरिकांमध्येही चांगली छाप निर्माण झाली. सध्या पडघा पोलीस ठाणे, ठाणे ग्रामीण येथे गुन्हे प्रकटीकरण शाखेत कार्यरत असून, पोलीस सेवेत प्रामाणिकपणे व जबाबदारीने कर्तव्य बजावत आहे. तेथेही आपल्या जबाबदारीला सर्वोच्च प्राधान्य देत पोलीस सेवेत कार्यरत आहेत. पोलीस दलातील सेवेला केवळ नोकरी न मानता ती समाजाप्रती असलेली जबाबदारी म्हणून पार पाडण्याची त्यांची भूमिका त्यांच्या कामातून सातत्याने दिसून येते.
केंद्रीय गृह मंत्रालयाकडून मिळालेला ‘उत्कृष्ट सेवा पदक’ हा केवळ एका पोलीस कर्मचाऱ्याचा वैयक्तिक सन्मान नसून, त्यांच्या कर्तव्यनिष्ठ सेवेला मिळालेली प्रतिष्ठेची पावती आहे. अनेकदा पोलीस कर्मचारी प्रसिद्धीपासून दूर राहून अहोरात्र कर्तव्य बजावत असतात. नागरिकांच्या सुरक्षिततेसाठी, कायदा व सुव्यवस्था अबाधित ठेवण्यासाठी आणि समाजात शांतता कायम राहण्यासाठी पोलीस दलातील प्रत्येक कर्मचाऱ्याचे योगदान महत्त्वाचे असते. अशाच सेवेला राष्ट्रीय पातळीवरील सन्मान मिळणे ही निश्चितच अभिमानाची बाब आहे.
योगेश भारती बाळकृष्ण वाघेरे यांचा पोलीस दलातील उल्लेखनीय सेवेसोबतच त्यांच्या शैक्षणिक प्रवासाचीही प्रेरणादायी वाटचाल राहिली आहे. त्यांचे मूळ गाव बेलवड, पोस्ट वैतरणा, तालुका शहापूर, जिल्हा ठाणे असून, ग्रामीण आणि प्रतिकूल परिस्थितीतून शिक्षण घेत त्यांनी आपल्या जिद्द, मेहनत आणि चिकाटीच्या जोरावर पुढील वाटचाल केली. त्यांचे प्राथमिक शिक्षण इयत्ता पहिली ते चौथीपर्यंत जिल्हा परिषद शाळा, बेलवड येथे झाले. त्यानंतर इयत्ता पाचवी ते दहावीपर्यंतचे शिक्षण भाऊराव लक्ष्मण सदगीर विद्यालय, मेंगाळपाडा, वैतरणा, तालुका शहापूर येथे पूर्ण केले. पुढे त्यांनी अकरावी ते बारावीचे शिक्षण स्वामी विवेकानंद कॉलेज, वाडा, तालुका पालघर येथे घेतले. त्यानंतर जीवनदीप महाविद्यालय, खर्डी येथे उच्च शिक्षणाची वाटचाल सुरू ठेवली.
ग्रामीण भागातील साध्या शैक्षणिक वातावरणातून सुरुवात करून विविध ठिकाणी शिक्षण घेत त्यांनी आपल्या ज्ञानाची आणि व्यक्तिमत्त्वाची जडणघडण केली. शिक्षणातून मिळालेली शिस्त, संस्कार आणि आत्मविश्वास यांची जोड त्यांच्या पुढील व्यावसायिक वाटचालीला मिळाली. याच जिद्दीच्या आणि सातत्यपूर्ण प्रयत्नांच्या बळावर त्यांनी पोलीस दलात प्रवेश करून कर्तव्यनिष्ठ सेवेद्वारे आपली स्वतंत्र ओळख निर्माण केली.
आज केंद्रीय गृह मंत्रालयाच्या ‘उत्कृष्ट सेवा पदका’ने गौरविण्यात आलेल्या योगेश वाघेरे यांच्या यशामागे त्यांच्या या संघर्षमय आणि सातत्यपूर्ण प्रवासाचीही महत्त्वाची भूमिका आहे. बेलवडच्या जिल्हा परिषद शाळेपासून सुरू झालेला हा प्रवास राष्ट्रीय स्तरावरील सन्मानापर्यंत पोहोचणे, ही त्यांच्या कर्तृत्वाची आणि जिद्दीची प्रेरणादायी कहाणी आहे. सन २०१० साली पोलीस खात्यात सेवेत रुजू झाले.
योगेश वाघेरे यांच्या या गौरवास्पद कामगिरीबद्दल मित्रपरिवार आणि सहकाऱ्यांनी आनंद व्यक्त केला आहे. ‘कर्तव्यनिष्ठा, प्रामाणिक सेवा आणि समर्पणाची ही अभिमानास्पद पावती असून, मित्र म्हणून त्यांच्या यशाचा मनापासून आनंद आणि अभिमान वाटतो,’ अशा भावना व्यक्त करत त्यांचे अभिनंदन करण्यात आले आहे.
पोलीस सेवेत प्रामाणिकपणे काम करणाऱ्या प्रत्येक कर्मचाऱ्यासाठी अशा प्रकारचा सन्मान निश्चितच प्रेरणादायी ठरतो. योगेश वाघेरे यांच्या या यशामुळे टिटवाळा परिसरातील त्यांच्या परिचितांमध्येही अभिमानाचे वातावरण असून, त्यांच्या पुढील सेवाकार्यासाठी शुभेच्छा व्यक्त होत आहेत.
Leave a Reply