केडीएमसीचा इशारा; गृहनिर्माण संस्था आणि नागरिकांना नियमांचे पालन बंधनकारक
कल्याण, दि. ५ ऑगस्ट : कल्याण-डोंबिवली महानगरपालिका (केडीएमसी) हद्दीत बांधकाम, दुरुस्ती किंवा पाडकामादरम्यान निर्माण होणारा राडारोडा (C&D Waste) उघड्यावर टाकणाऱ्या व्यक्ती व संस्थांवर आता कठोर कारवाई करण्यात येणार आहे. **बांधकाम आणि पाडकाम (Construction & Demolition) कचरा व्यवस्थापन नियम २०१६** अंतर्गत नियमांचे उल्लंघन करणाऱ्यांवर **पर्यावरण (संरक्षण) कायदा १९८६ च्या कलम १५** नुसार कारवाई करण्याचा इशारा महापालिकेने दिला आहे.
महापालिकेच्या घनकचरा व्यवस्थापन विभागाने स्पष्ट केले आहे की, नवीन बांधकाम, दुरुस्ती किंवा पाडकाम करणाऱ्या व्यक्ती अथवा संस्थांनी निर्माण होणारा कचरा उघड्यावर टाकण्याऐवजी नियमानुसार सुरक्षितपणे गोळा करून अधिकृत केंद्रापर्यंत पोहोचवणे बंधनकारक आहे. या संपूर्ण प्रक्रियेचा खर्च आणि व्यवस्थापन संबंधित कचरा निर्मिती करणाऱ्यांनीच करणे आवश्यक असून, कचऱ्याचे वर्गीकरण, पुनर्वापर आणि योग्य विल्हेवाट लावणे हा या नियमांचा मुख्य उद्देश आहे.
महापालिकेने गृहनिर्माण संस्थांनाही महत्त्वाची सूचना केली आहे. सोसायटीच्या आवारात नवीन बांधकाम, दुरुस्ती किंवा पाडकाम सुरू करण्यापूर्वी संबंधितांनी आपल्या प्रभागातील स्वच्छता अधिकारी किंवा स्वच्छता निरीक्षक यांना तातडीने माहिती द्यावी. त्यामुळे महापालिकेला संबंधितांना कचरा व्यवस्थापनाबाबत आवश्यक मार्गदर्शन करणे आणि योग्य व्यवस्था उपलब्ध करून देणे शक्य होणार आहे.
मात्र, महापालिकेला कोणतीही पूर्वकल्पना न देता गृहनिर्माण संस्थेतील सदस्यांनी बांधकाम किंवा पाडकामातून निर्माण झालेला राडारोडा सार्वजनिक ठिकाणी किंवा उघड्यावर टाकल्याचे आढळल्यास संबंधितांविरुद्ध थेट कायदेशीर कारवाई करण्यात येणार आहे. यासंदर्भातील परिपत्रकही सर्व गृहनिर्माण संस्थांना पाठविण्यात येत असल्याची माहिती महापालिकेच्या घनकचरा व्यवस्थापन विभागाचे उपायुक्त **रामदास कोकरे** यांनी दिली.
महापालिकेच्या या निर्णयामुळे शहरातील राडारोड्यामुळे होणारे प्रदूषण, रस्त्यांवरील अडथळे आणि सार्वजनिक ठिकाणांचे विद्रूपीकरण रोखण्यास मदत होणार असून, नागरिकांनी नियमांचे काटेकोर पालन करण्याचे आवाहन प्रशासनाने केले आहे.
Leave a Reply